काठमाडौं । प्रधानमन्त्री शेरवहादुर देउवा आजको संसद बैठकमा जसरी पनि अ‍ेमरिकी सहयोग नियोग एमसीसी सम्झौता अनुमोदन गरेर जानुपर्ने पक्षमा ढृढ देखिएका छन् । उनले आजको संसद बैठकमा प्रस्ताव अनुमोदनका लागि लैजाने भन्दै एमसीसी सम्झौता संसदमा टेवुल गर्नका लागि प्रधानमन्त्रीले अर्थमन्त्री जर्नादन शर्मालाई टेलिफोन गरी प्रस्ताव गरेको बालुवाटार निकट स्रोतले बताएको छ ।

तर प्रधानमन्त्रीको त्यस्तो आग्रह् अर्थमन्त्री जर्नादन शर्माले अश्वीकार गरेका छन् । ‘तत्कालीन अर्थमन्त्रीले गरेको सम्झौता हो, त्यसैको निरन्तरताका लागि वर्तमान अर्थमन्त्रीका रूपमा तपाईंले टेबल गर्नुस्’ प्रधानमन्त्रीले टेलिफोनमा अर्थमन्त्रीसँग भनेका थिए ।

तर अर्थमन्त्री शर्माले एमसीसीका विषयमा आफनो पार्टीको फरक मत रहेको भन्दै आफुले संसदमा सम्झौता सिधै पेश गर्न नसक्ने जानकारी प्रधानमन्त्रीलाई दिएका छन् । शर्माले पार्टीले फरक मत राखेको र अरू प्राविधिक कारणले पनि आफू बुधबार बैठकमै अनुपस्थित हुने भएकाले विकल्प खोज्न सुझाव दिएका थिए । शर्माले अस्वीकार गरेपछि प्रधानमन्त्रीले सञ्चारमन्त्री ज्ञानेन्द्रबहादुर कार्कीलाई टेबल गर्ने जिम्मेवारी दिएका छन् ।

कार्की अर्थमन्त्री रहेकै बेला २०७४ मा एमसीसी सम्झौतामा हस्ताक्षर गरेका थिए ।