काठमाडौँ । आगामी वैशाख ३ गते काठमाडौंमा हुने सांगितिक कार्यक्रममा भाग लिन सलमान खानसहित बलिउड कलाकारहरु नेपाल आउने भएका छन् ।

लाजिम्पाटमा रहेको ओडीसी इन्टरटेनमेन्टले सलमानसहितका बलिउड कलाकारलाई काठमाडौं ल्याउन लागेको हो । बलिउड कलाकारहरुलाई ४ करोड बढी पारिश्रमिक दिएर ओडिसीले नेपाल ल्याउन लागेको हो ।

दशरथ रंगशालामा हुने सांगीतिक कार्यक्रममा सलमानसहित अभिनेत्री सोनाक्षी सिन्हा, ज्याकलिन फर्नान्डिज, कोरोयोग्राफर प्रभु देवा, मुदस्सर खान, अभिनेता मनिष पल, आयुश शर्मा लगायत नेपाल आउनेछन् ।

ओडीसी इन्टरटेनमेन्टले १० वर्षअघि क्यानेडियन पप गायक ब्रायन एडम्सलाई सांगितिक कार्यक्रममा भाग लिन काठमाडौं ल्याएको थियो ।

यसअघि ०७४ फागुन २६ गते सलमान काठमाडौंको टुँडीखेलमा सांगीतिक कार्यक्रमका लागि आउने तय भए पनि अन्तिम समयमा स्थगित भएको थियो ।

एक साताअघि सलमान खानको भारतीय एजेन्सी जेए इभेन्ट्सको टोली काठमाडौं आई फर्केको थियो ।