काठमाडौँ । नेपालको पहिलो बैंक नेपाल बैंक लिमिटेडका कर्मचारी एवं ग्राहकलाई काठमाडौँको बि.एण्ड बि. अस्पतालमा उपचार गर्दा लाग्ने शुल्कमा विशेष छुट प्रदान गर्ने सम्झौता भएको छ । बैंक र अस्पतालबीच भएको सम्झौता बमोजिम बैंकमा कार्यरत कर्मचारीलाई अस्पतालको सेवामा लाग्ने शुल्कमा १५ प्रतिशत छुटलगायतको छुट हुने भएको हो ।

बि.एण्ड बि. अस्पताल ग्वार्को ललितपुरमा भएको उक्त सम्झौता पत्रमा अस्पतालका तर्फबाट प्रा.डा.अशोक कुमार बाँस्कोटा र बैंकका प्रमुख कार्यकारी अधिकृत श्री कृष्ण बहादुर अधिकारीले हस्ताक्षर गरेका हुन् । उक्त कार्यक्रममा अस्पतालका बाँस्कोटाले नेपाल बैंकका कर्मचारी एवं ग्राहकलाई न्यूनतम शुल्कमा उच्चस्तरिय सेवा दिन पाउँदा खुसी लागेको बताए ।

त्यसैगरी नेपाल बैंकका प्रमुख कार्यकारी अधिकृत अधिकारीले नेपालको स्वास्थ्य सेवामा आफ्नो विशेष स्थान बनाउन सफल अस्पतालसँग सहकार्य गर्न पाएकोमा खुसी व्यक्त गरे ।