काठमाडौँ । युक्रेनमा रुसको सैन्य कारबाही शुरु भएदेखि करिब १० लाख नागरिकले आफ्नो देश छाडेका छन् । संयुक्त राष्ट्र शरणार्थी एजेन्सीका अनुसार सात दिनमा करिब १० लाख युक्रेनी नागरिकले देश छाडेका हुन् ।

आफ्नो ट्विटर ह्यान्डलमा राष्ट्र शरणार्थी एजेन्सीका उच्चायुक्त फिलिपो ग्रान्डीले लेखेका छन् ‘केवल सात दिनमा हामीले युक्रेनबाट छिमेकी देशमा १० लाख मानिस पलायन भएको देख्यौँ ।’

रुसी राष्ट्रपति भ्लादिमिर पुटिनले युक्रेनको डोनबास क्षेत्रमा सैन्य कारबाही गर्न आदेश दिएको आठ दिन बितिसकेको छ । उनले युक्रेनका टुक्रिएका क्षेत्रहरू डोनेट्स्क र लुहान्स्कको स्वतन्त्रतालाई मान्यता दिएपछि तनाब युद्धमा परिणत भएको छ ।

यसैबीच, संयुक्त राष्ट्र संघको महासभामा बुधबार भएको मतदानमा १४१ राष्ट्रले युक्रेनमा रुसको आक्रमणको निन्दा गरेका छन् । पाँच राष्ट्रले समर्थन गरेका छन् ।