काठमाडौं । सरकारको नेतृत्व गरिरहेको नेपाली कांग्रेसले आसन्न निर्वाचनलाई लक्षित गरी एक महिने अभियान सञ्चालन गर्ने भएको छ ।

‘घरघर जाऔँ, नेपाली कांग्रेसलाई जिताऔँ’ अभियानका साथ कांग्रेस मतदाताको घर घर पुग्न लागेको हो । कांग्रेस केन्द्रीय कार्य समितिको मंगलबार बसेको बैठकले यहि फाल्गुन २९ गतेदेखि एक महिनासम्म अभियान सञ्चालन गर्ने कांग्रेसले निर्णय गरेको हो ।

निकै जोड गरेर अमेरिकी सहयोग परियोजना एमसीसी पास गराएको भन्दै कांग्रेसको आलोचना भइरहेकाबेला एमसीसी विकास परियोजना भएको भन्दै भ्रम निवारण गरिने पनि कांग्रेसले जनाएको छ ।

अभियान सुरु हुनु भन्दा २ दिनअघि सबै जिल्ला जिल्लाको बैठक बसेर अभियानको तयारी थाल्न जिल्ला पार्टीलाई निर्देशन दिइएको छ । एक महिना निर्वाचन केन्द्रित अभियानको ८ वटा उद्देश्य रहेको कांग्रेसले जनाएको छ ।