काठमाडौँ । अर्थमन्त्री जनार्दन शर्माले प्रणाली अनुरुपको सामाजिक न्याय हुन नसक्दा गणतन्त्रपछि पनि आर्थिक विकास हुन नसकेको बताएका छन् ।

राष्ट्रिय आर्थिक सरोकार समाज, नेपालले शुक्रबार काठमाडौंमा आयोजना गरेको नेपाली अर्थतन्त्रको समसामयिक मुद्दा र समाजवाद उन्मुख अर्थतन्त्र निर्माणको कार्य दिशामाथि छलफलमा बोल्दै अर्थमन्त्री शर्माले आर्थिक विकास हुन नसकेको बताएका हुन् ।

उनले सामाजिक न्याय र कसरी मौलिक अधिकारलाई परिपूर्ति गर्न सकिन्छ ? भन्नेबारेमा सबै राजनीतिक दलमा आधारभूत एक रुपता हुनु पर्ने बताए । उनले अहिले शोधनान्तर घाटाको अवस्था ठूलो रहेको बताएका थिए ।

‘आज गणतन्त्रपछि पनि विकासले नयाँ गति लिन नसक्नुको कारण हाम्रो यो प्रणाली राज्य प्रणालीको कुरा गरेका छौँ, त्यो प्रणालीअनुरुप के को कुरा के हो भन्ने एउटाले अर्कोले अर्को कुरा भनिरहेको छ,’ उनले भने, ‘कसरी हुनसक्छ सामाजिक न्याय, कसरी मौलिक अधिकारलाई परिपूर्ति गर्न सकिन्छ ?, भन्ने प्रश्नमा राजनीतिक दलहरुका आधारभूत एकरुपता चाहिन्छ, सबै सैद्धान्तिक कुरा मात्रै होइन ।’

मन्त्री शर्माले कोरोना महामारीका बीच पनि आर्थिक क्रियाकलापमा वृद्धि भइरहेको बताउँदै पछिल्लो समय आयात बढेको र उपभोग्य वस्तुको आयात, कृषिजन्य वस्तुको आयात अर्बौंमा रहेको बताए ।