काठमाडौँ । नेपालले मलेसियालाई २२४ रनको लक्ष्य दिएको छ । त्रिवि मैदानमा जारी खेलमा नेपालले ५ विकेटको क्षतिमा २० ओभर खेल्दै २२३ रन बनाएको हो ।

खेलमा दीपेन्द्र सिंह ऐरीले ५७ बल खेल्दै ११० रनको शतक हाने । उनी ६ छक्का र १० चौकाको मद्दतमा ११० रनमा अविजित रहे ।

दीपेन्द्र ओडीआई र टी २० आईमा शतक प्रहार गर्ने दोस्रो नेपाली खेलाडी बनेका छन् । यसअघि पूर्व कप्तान पारस खड्काले मात्रै दुवै फर्म्याटमा शतक हानेका थिए ।

यस्तै, रोहित पौडेलले पहिलो अर्धशतक प्रहार गरे । उनले ३४ बल खेल्दै ५ चौका मद्दतमा ५१ रन बनाए । यी दुई खेलाडीले तेस्रो विकेटका लागि ९६ रनको साझेदारी गरे ।

ओपनर आसिफ शेखले १८ र कुशल भुर्तेलले १२ रन बनाएर फर्किए । आरिफ शेख २ रन बनाएर आउट हुँदा आदिल अन्सारीले १४ रन जोडे ।

बलिङमा मलेसियाका लागि मुहम्मद वाफिक, पवनदिप सिंह, स्याज्रुल ईद्रुस र मुहम्मद अमिरले समान १–१ विकेट लिए ।

टस जितेर मलेसियाले नेपाललाई पहिलो ब्याटिङको निम्तो दिएको थियो ।