मोरङ । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले देशभरि आफ्नो पार्टीको लहर छाएको बताएका छन् । मोरङमा शनिबार आयोजित सभामा उनले भने, ‘के गाउँ के सहर, अब राप्रपाकै लहर ।’

लिङ्देनले नेपाली कांग्रेस, नेकपा एमाले र नेकपा माओवादी केन्द्रले जनमत पाएर देश बनाउन नसकेको आरोप लगाएका छन् । उनले यी दललाई निर्वाचनमा विजयी बनाएर देश बन्छ भन्दा पश्चातापबाहेक केही हात नपर्ने बताए ।

कांग्रेस, एमाले र माओवादीले पटक–पटक देश विकासको नेतृत्व गर्ने अवसर पाए । तर, उक्त अवसरलाई सदुपयोग गर्न नसकेको उनको भनाइ छ । अध्यक्ष लिङ्देनले देशका प्रमुख राजनीतिक दललाई देश र जनताले महसुस हुने गरी काम देखाउन चुनौती दिए ।

उनले यस्ता राजनीतिक दललाई फेरि सत्तामा पुर्‍याउनु देशलाई थप बरबादीको दिशातर्फ धकेल्ने काम हुने बताए । उनले ठूला दलबाट देश बन्छ भनेर अपेक्षा गर्नु दुध दुहनका लागि साँढेको टाङ मुनी बाल्टी थाप्नु जस्तै भएको टिप्पणी गरे ।

स्थानीय तह निर्वाचनलाई लक्षित गरी राप्रपाले सभालाई सम्बोधन गर्दै लिङ्देनले भने, ‘साँढेको टाङमुनी बाल्टी थापेर साँढेले दुध दिएन भनेर त्यसलाई सुम्सुम्याउँदा, कन्याउँदा, हैन यसलाई खाना पुगेन भनेर दाना थप्दा पनि दुध दिँदैन, ठूला दलबाट देश बन्छ भनेर अपेक्षा गर्नु हो त्यस्तै हो ।’

उनले शेरबहादुर देउवा, केपी ओली र प्रचण्ड कतिपटक प्रधानमन्त्री भए देश बन्छ ? भनेर प्रश्नसमेत गरेका थिए । ‘अब तिनै पार्टी, तिनै नेताबाट देश बन्छ भनेर तिनैलाई हाम्रो बाजेको पार्टी बाउको पार्टी मैले यति लेबी तिरेको भनेर भोट दिइराख्नु भनेको र यिनै पार्टीबाट देश बन्छ भनेर अपेक्षा राख्नु भनेको साँढेको टाङमुनी बाल्टी थाप्नु जस्तै हो,’ उनले भने, ‘जबसम्म तिनै पार्टीलाई भोट हाल्नुहुन्छ तबसम्म देशले परिवर्तन र विकास प्राप्त गर्दैन ।’

उनले देश बिगारेर असफल राष्ट्रको मुखसम्म धकेल्नमा ठूला पार्टी र नेता जस्तै अर्को चिह्नमा हात लाग्दैन भनेर भोट दिने मतदाता पनि दोषी भएको बताए ।

शक्ति राष्ट्र नेपालमा रणनीतिक रूपमा प्रतिस्पर्धा गरिरहेको लिङ्देनले बताए । नेपाललाई रणनीतिक प्रतिस्पर्धा बनाइएको उनको भनाइ छ । उनले भने, ‘कुनै बेला हामीले युक्रेनको नियति व्यहोर्नु पर्ने अवस्था आउने खतरा हाम्रो सामु देखिएको छ, उनीहरूको आलोकाँचो व्यवहारले हुने क्षति ठूला पार्टीले मात्र व्यहोर्नु पर्दैन, सिंगो देश र जनताले क्षति व्यहोर्नु पर्ने छ ।’

नेता लिङ्देनले अब आउने चुनाव नेपाली जनताका लागि विगतका गल्ती सच्याउने अवसर भएको बताए । जनताले दिने एक भोटले गलत पार्टी र गलत नेताले जिते देशले दुःख पाउने उल्लेख गरे । आगामी वर्ष हुने तीनै तहको चुनाव सोचेर जनता र देशको पक्षमा हुने गरी मतदान गर्न अध्यक्ष लिङ्देनले सबैमा आग्रह गरे ।

‘गलत नेता र पार्टीको चयन गर्दा देशले दुःख पाउँछ, सोचेर भोट दिनुस्’, उनले भने ।