काठमाडौँ । प्रमुख प्रतिपक्ष दल नेकपा एमालेका अध्यक्ष केपी शर्मा ओलीले स्थानीय तह निर्वाचनमा उठेका अन्य दलका उम्मेदवार चर्चा गर्न लायक नभएको टिप्पणी भएका छन् ।

अध्यक्ष ओलीले उम्मेदवार बन्ने इच्छा गर्नु अन्य दलका उम्मेदवारको अधिकार भए पनि चर्चा गर्न लायक नभएको बताएका हुन् । अन्तर्राष्ट्रिय श्रमिक दिवसको अवसरमा आइतबार काठमाडौँमा आयोजित एक कार्यक्रममा बोल्दै उनले आवश्यता नभएका अन्य दलका उम्मेदवारलाई छोडेर सूर्य चिन्हमा मतदान गर्न आग्रह गरे ।

अध्यक्ष ओलीले काठमाडौँलाई विश्वकै नमूना र सफा राजधानी बनाउने बताए । यस्तै, उनले बागमती, विष्णुमती नदीलाई पूर्ण सफा बनाउने संकल्पका साथ एमालेले काठमाडौँ महानगरको उम्मेदवार बनाएको दाबी गरे ।

उनले केशव स्थापितको अनुभव र अन्य युवा उम्मेदवारको जोशलाई मिलन गरेर काठमाडौँ महानगरलाई आफ्नो पार्टी समृद्ध बनाउन चाहेको स्पष्ट पारे । उनले भने, ‘कसैको उम्मेदवारीको बारेमा म केही भन्न चाहन्न, किनभने चर्चा गर्न लायक नै छैनन्, केही कुरा गरिरहनु पर्ने आवश्यक्ता छैन, त्यसकारण म कसैको बारेमा केही भनिरहन चाहन्न ।’

अध्यक्ष ओलीले पार्टीको चुनावी घोषणा पत्र र स्थानीय तहको प्रतिबद्धता पत्र लिएर चुनावी प्रचार अभियानलाई तीव्रता दिन पार्टीका नेता, कार्यकर्तालाई आग्रह गरे । उनले मजदुरको हक, अधिकार सुनिश्चित गर्ने एमाले सदैव तयार रहेको पटकपटक दोहो¥याए ।