काठमाडौँ । नेपाली कांग्रेसका महामन्त्री गगन थापाले एमालेले मतदाताको अभिमतको अवमूल्यन गरेको बताएका छन् । उनले स्थानीय तहको निर्वाचन परिणाम नआउँदै एमालेले सिंगो निर्वाचन प्रक्रियामाथि प्रश्न उठाएर अभिमतको अवमूल्यन गरेको बताएका हुन् ।

एमालेका महासचिव शंकर पोखरेलले विज्ञप्ति जारी गर्दै चुनावमा सत्ता गठबन्धनले धाँधली गरेको आरोप लगाएसँगै महामन्त्री थापाले जवाफ दिएका हुन् ।

‘मतदानसम्म ठीक, मत, गणनाको प्रारम्भमा पनि ठीक तर, प्रारम्भिक विवरण आउन थालेपछि अन्तिम परिणाम कुर्नेसमेत धैर्यता नराखी नेकपा एमालेले सिंगो निर्वाचन प्रक्रियामाथि अनेकन प्रश्न उठाउनु ३० गते मतदान गर्ने प्रत्येक मतदाताको अभिमतको अवमूल्यन हो,’ थापाले सामाजिक सञ्जालमा लेखेका छन् ।

एमाले महासचिव पोखरेलले निर्वाचनमा मतदान र मत गणनामा गठबन्धनले योजनाबद्ध धाँधली गरेको आरोप लगाएका थिए ।