इलाम । नेकपा एकीकृत समाजवादीका वरिष्ठ नेता तथा पूर्व प्रधानमन्त्री झलनाथ खनालको निर्वाचन क्षेत्रमा पर्ने इलामको माइजोगमाई गाउँपालिकामा नेकपा एमालेका उम्मेदवार निर्वाचित भएका छन् ।

सत्ता गठबन्धनका उम्मेदवार जित बहादुर राईलाई पराजित गर्दै एमालेका उम्मेदवार कुशबहादुर थेबे गाउँपालिका अध्यक्षमा निर्वाचित भएका हुन् । गठबन्धन दलको तर्फबाट गाउँपालिकामा नेकपा एकीकृत समाजवादीका जीत बहादुर उम्मेदवार बनेका थिए ।

थेबेले पाँच हजार १५३ मत प्राप्त गर्दा राईले चार हजार ९१३ मत पाएका छन् । राईले २०७४ सालको स्थानीय तहको निर्वाचनमा एमालेबाट उम्मेदवार बनेर गाउँपालिका अध्यक्ष जितेका थिए । एमाले विभाजन पछि उनी नेकपा एसमा लागेका थिए ।

उपाध्यक्षमा भने गठबन्धनका उम्मेदवार बनेकी नेपाली कांग्रेसकी प्रविना राई निर्वाचित भएकी छन् । उनले एमालेकी उम्मेदवार सावित्रा भट्टराईलाई पराजित गरिन् ।

राईले पाँच हजार १५९ मत पाउँदा भट्टराईले चार हजार ८८३ मत पाएकी छन् । भट्टराईले पहिलो स्थानीय तहको निर्वाचनमा एमालेबाट उपाध्यक्ष जितेकी थिइन् ।