नुवाकोट । जिल्लाको विदुर नगरपालिकाको मेयरमा नेपाली कांग्रेसका उम्मेदवार विजयी भएका छन् । तीन दशकसम्म एमालेले जितेको उक्त नगरपालिकामा गठबन्धनको बलमा कांग्रेसका उम्मेदवार मेयरमा विजयी भएका हुन् ।

कांग्रेसका राजन श्रेष्‍ठ मेयरमा विजयी हुँदा उपमेयरमा नेकपा माओवादी केन्द्रकी प्रभा बोगटी निर्वाचित भएकी छन् । मेयरमा निर्वाचित श्रेष्ठले १४ हजार ३१६ मत ल्याएका थिए । मेयरमा नेकपा एमालेका उम्मेदवार सन्जु पण्डितले १० हजार ७०४ मत ल्याएकी छन् ।

उपमेयरमा निर्वाचित माओवादी केन्द्रकी उम्मेदवार बोगटीले ११ हजार ६०६ मत पाइन् । उनका निकटतम प्रतिद्वन्द्वी एमालेकी उम्मेदवार अम्बिका नेपालले १० हजार ५४४ मत ल्याइन् ।

उक्त नगरपालिकामा ३० वर्षपछि पहिलोपटक एमालेको गढ तोडिएको हो ।