काठमाडौं । निर्वाचन आयोगले हालसम्म ७०५ पालिकाको मत गणना सम्पन्न भएको जानकारी दिएको छ । गत वैशाख ३० गते देशभर ७५३ वटा पालिकामा सम्पन्न निर्वाचनको मत गणना सकिन लागेको हो ।

आयोगका अनुसार ४८ पालिकाको अन्तिम मत परिणाम आउन बाँकी छ । हालसम्म मत परिणाम सकिएका पालिकामध्ये सबैभन्दा बढीको प्रमुख तथा अध्यक्षमा नेपाली कांग्रेसका उम्मेदवार विजयी बनेका छन् ।

कांग्रेसले हालसम्म ३११ पालिकाको प्रमुख र उपप्रमुखमा जित हात पारेको छ । मत गणना भइरहेकामध्ये १४ पालिकामा अग्रता लिइरहेको छ ।

यस्तै ठूलो संख्यामा क्रमसः नेकपा एमाले, नेकपा माओवादी केन्द्र, जनता समाजवादी पार्टी (जसपा), नेकपा एकीकृत समाजवादी र लोकतान्त्रिक समाजवादी पार्टीका उम्मेदवार विजयी बनेका छन् ।

एमालेले हालसम्म १९० पालिकाको प्रमुख तथा उपप्रमुतमा जित हात पारेको छ । मत गणना भइरहेका पालिकामध्ये १६ वटाको एमालेका उम्मेदवारले अग्रता लिइरहेका छन् ।

माओवादीका उम्मेदवार १२० वटा पालिकाको प्रमुख तथा उपप्रमुखमा विजेता हुँदा मत गणना हुन बाँकी २ पालिकामा अग्रता लिइरहेका छन् ।

जसपाले हालसम्म २७ पालिकाको प्रमुखमा जितेको छ । मत गणना चलिरहेकामध्ये ३ पालिकामा उसले अग्रता लिएका छन् ।

नेकपा एसले १७ पालिकाको प्रमुख तथा उपप्रमुखमा जित हात पारेको छ । मत गणना भइरहेका पालिकामध्ये दुई वटामा उसका उम्मेदवारले अग्रता लिइरहेका छन् ।

तोकतान्त्रिक समाजवादीले हालसम्म १२ पालिकाको प्रमुख तथा उपप्रमुखमा जित हात पारेको छ भने ५ वटामा अग्रता लिइरहेका छन् ।

आयोगका अनुसार हालसम्म २८ पालिकाको प्रमुख तथा उपप्रमुखमा अन्य दल तथा स्वतन्त्र उम्मेदवारले जितेका छन् । मत गणना भइरहेकामध्ये तीन पालिकामा अझै स्वतन्त्र उम्मेदवारले अग्रता लिइरहेका छन् ।