काठमाडौँ । नेपालको पहिलो बैंक नेपाल बैंक लिमिटेले आगामी आर्थिक वर्ष २०७९–८० को बैंकको बजेट तथा कार्यक्रम तय गर्ने उद्देश्यले बाग्मती प्रदेश स्तरीय बजेट गोष्ठी सम्पन्न भएको छ ।

वैशाख ४ देखि ७ गतेसम्म धुलीखेलमा आयोजित बजेट गोष्ठीमा नेपाल बैंक व्यवस्थापन, बाग्मती प्रादेशिक कार्यालय र सोअन्तर्गतका सम्पूर्ण शाखाका ६० जना शाखा प्रबन्धकको सहभागिता रहेको थियो ।

बैंक व्यवस्थापनले शाखासँग अन्तक्रिया गरी शाखा प्रबन्धकबाट प्राप्त सल्लाह एवं सुझावसमेतलाई समेटेर बजेट निर्माण गर्दा त्यसको प्रभावकारीता बढी हुने साथै आगामी आर्थिक वर्षमा बैंकले लिने निक्षेप तथा कर्जाको लक्ष्य, ग्राहक सेवा तथा बजारीकरणमा गर्नुपर्ने नीति तथा रणनीति, डिजिटल बैंकिङ्मा बढावा दिने लगायतका विषयमा बृहत रुपमा छलफल गरी सो सम्बन्धमा आवश्यक कार्यक्रम तय गर्न सहज हुने देखिएकाले यस्ता कार्यक्रमहरु प्रत्यक वर्ष आयोजना गरिदै आएको बैंकले जनाएको छ ।

कार्यक्रममा बैंकका प्रमुख कार्यकारी अधिकृत कृष्ण बहादुर अधिकारीले नेपाल बैंकको हालको जनशक्ति भनेको नेपालको बैंकिङ् क्षेत्रकै क्रिम तथा युवा जनशक्ति भएको उल्लेख गर्दै यही जनशक्तिको कडा मेहनेतले गर्दा नेपाल बैंक प्रतिस्पर्धी बैंकको रुपमा अगाडि आएको बताए ।

कार्यक्रममा बैंकका प्रवक्ता तथा सहायक प्रमुख कार्यकारी अधिकृत प्रकाश कुमार अधिकारी, सहायक प्रमुख कार्यकारी अधिकृत होम बहादुर खड्का, योजना तथा बजेट विभागकी मुख्य प्रबन्धक प्रतिभा डंगोललगायतको सहभागिता थियो ।

नेपालमा २१३ शाखामार्फत वित्तीय सेवा दिँदै आएको बैंक हाल ग्राहक सेवामा व्यापक सुधार गरी आधुनिक बैंकिङ्ग प्रविधिमार्फत सेवा दिँदै आएको छ ।