काठमाडौँ । फोब्र्स पत्रिकामा डलर अर्बपतिको सूचीमा रहेका नेपाली कांग्रेसका सांसद विनोद चौधरीले सरकारले प्रस्तुत गरेको बजेट नयाँ दृष्टिकोण र दृढताको प्रस्थान बिन्दुमा रहेको बताएका छन् ।

मंगलबार बसेको प्रतिनिधिसभा बैठकमा बोल्दै सांसद चौधरीले आर्थिक वर्ष २०७९–८० को बजेटलाई नयाँ दृष्टिकोण र नयाँ दृढताको रुपमा चित्रण गरेका हुन् । उनले बजेटले निजी क्षेत्रलाई विकासको इञ्जिनको रुपमा प्रष्टसँग स्वीकारेको बताए ।

‘योपटक अर्थमन्त्री जीले खास गरी निजी क्षेत्रलाई एउटा डेभलपमेन्टको इञ्जिनका रुपमा प्रष्टसँग स्वीकार्नु, मेक इन नेपालजस्ता दुरगामी सोच बोकेको १० वर्षको स्पष्ट औद्योगिक विकासको ढाँचा बोकेको रोडम्यापलाई अंगाल्नु मलाई लाग्छ कि, यो सुधारतर्फको पहिलो महत्वपूर्ण चरण हो,’ उनले भने ।

यस्तै, वैदेशिक लगानीमा १० करोडसम्म डिजिटल पेमेण्टको माध्यमबाट स्वीकृति पाइने व्यवस्था हुनु र स्वरोजगारमा प्रदेशलाई जिम्मेवार बनाइनु राम्रो भएको उनको भनाइ थियो ।