पोखरा । पोखरा महानगरपालिकामा एमाले बलियो हुँदाहुँदै पनि पार्टीभित्रकै घात /अन्तरघातका कारण एमालेका मेयरका उम्मेदवार कृष्ण थापा पराजित हुनुपरेको भन्दै एमालेले आफ्नै पार्टीका तीन स्थानीय नेतामाथी कारवाहीको डन्डा चलाएको छ । पार्टी उम्मेदवार हराउन र गठबन्धनका तर्फबाट नेकपा एकीकृत समाजवादीका धनराज आचार्यलाई जिताउन भूमिका खेलेको भन्दै एमालेले अन्र्तघाती पहिचान गरेर कारवाही गर्ने प्रक्रिया शुरु गरेको जनाएको छ ।

त्यही क्रममा शुरुआती चरणमा तीन जनामाथी कारवाही गरिएको एमाले पोखरा नगरकमिटिले जनाएको छ ।

कारबाहीमा पर्नेमा मनोज पहारी, महेश अर्याल र प्रशान्त आचार्य छन् । पहारीले प्रदेश सांसद राजीव पहारीको समेत नाम लिँदै विपक्षी दलका उम्मेदवार धनराज आचार्य जिताउन टेलिफोनमा पैसाको समेत लेनदेन गरेको अडिओ सार्वजनिक भएको थियो ।

उनले आफूलाई राजीव पहारीको स्वकीय सचिवसमेत बताउने गरेकोमा पहारीले भने उनी स्वकीय सचिव नरहेको बताएका छन् । मनोज पहारीलाई संगठित सदस्यबाट लिनम्बन गरिएको छ ।

त्यस्तै पोखरा ३३ वडाका उपाध्यक्ष महेश अर्याललाई पदीय जिम्मेवारीसहित संगठित सदस्यबाट समेत निलम्बन गरिएिको जिल्ला अध्यक्ष मनबहादुर गुरुङले प्रेस विज्ञप्तिमार्फत जनाएका छन् ।

एमालेले पोखरा ३३ कै अर्का कार्यकर्ता प्रशान्त आचार्यलाई पनि निलम्बन गरेको छ । पोखरा महानरमा एमालेका मेयर उम्मेदवार हराउन जिम्मेवार नेता कार्यकर्ता नै खुलेर लागेको र विपक्षी उम्मेदवार धनराज आचार्यसँग विभिन्न युवा समूह र अन्य क्लबका नाममा पैसा लिएको आरोप छ ।

उनीहरुलाई विधानको धारा ८० को अनुशासन उल्लंघन गरेको अभियोगमा धारा ८१ अनुसार कारवाही गरिएको विज्ञेप्तिमा जनाइएको छ ।

हेर्नुहोस वक्तब्य