काठमाडौं । एमालेकी सांसद गंगा चौधरीले सरकारले स्वास्थ्य सेवा प्रदानमा विभेद गरेको भन्दै आपत्ति जनाएकी छन् । प्रतिनिधिसभाको बिहीबार बसेको बैठकमा आर्थिक वर्ष २०७९–८० को राजश्व र व्ययको वार्षिक अनुमानमाथिको छलफलमा सहभागी हुँदै उनले केही जिल्लाका लागि मात्र सीमित रोगी र सुत्केरीलाई भत्ता उपलब्ध गराउने कार्यक्रमले विभेद गरेको भन्दै आपत्ति जनाइन् ।

जटिल रोगका बिरामीलाई दिइने पाँच हजार भत्ताले औषधि किन्न नपुग्ने भन्दै उनले आफू सिकलसेल एनिमियाको रोगी रहेकाले दैनिक एक हजार रुपैयाँको औषधि खानेको बताइन् । तर, गरिब तथा निम्न आय भएका सिकलसेल एनिमियाका रोगीले औषधि खान नसक्ने अवस्था रहेको बताएकी थिइन् ।

‘क्यान्सर र मिर्गौला रोगीलाई मासिक पाँच हजार दिन अब बन्द गर्नुस्, भीआईपीले पाउने उपचार खर्च गरिब जनतालाई दिनुस्,’ उनले भनिन्, ‘तपाईंहरुले ३० लाख खर्च गरेर मिर्गौला प्रत्यारोपण र डायलासिस गर्ने, अनि गरिब जनतालाई पाँच हजारले ललिपप देखाउन खोजेको हो ?’

२५ जिल्लामा सुत्केरी भत्ता दिने सरकारको कार्यक्रमले पनि जनतालाई विभेद गरेको बताएकी थिइन् । उनले बाँकी ५२ जिल्लाका महिला विवाहअघि बन्ध्याकरण गरेका हुन्छन् वा उनीहरुले बच्चा जन्माउनु नपर्ने हो भन्दै प्रश्न गरेकी थिइन् ।

‘५२ जिल्लाका दिदीबहिनीले विवाहअघि स्थायी बन्ध्याकरण गरेर विवाह गर्छन् ?, तिनीहरूले बच्चा जन्माउनु पर्दैन ? ५२ जिल्लामा गरिब, विपन्न महिला छैनन् ?, विभेदकारी तपाईंहरूको समाजवाद यही हो ?,’ चौधरीले प्रश्न गरिन् ।