काठमाडौँ । म्यानमारको सैनिक सरकारप्रति वफादार बन्दै यहाँको एक अदालतले आङ सान सुकीको पार्टी ‘नेशनल लिग फर डिमोक्रेसी पार्टी (एनएलडिपीं’का पूर्व सदस्य र एक प्रतिष्ठित प्रजातन्त्रवादी अधिकारकर्मीलाई मृत्युदण्ड दिने निर्णय सदर गरेको छ ।

उनीहरू दुवैलाई आतंकवादलाई प्रश्रय गरेको भन्दै दोषी ठहर गरिएको हो । सन् १९९० देखि देशमा अदालतले मृत्युदण्डलाई सदर गरेको योपहिलो घटना भएको आङ साङ सरकारी प्रवक्ताले एएफपीलाई जनाएको छ ।

प्रवक्ता जाउ मिन तुनले एएफपीसँग भने, ‘पूर्व सांसद फियो जेया थाउ र प्रजातन्त्रवादी अधिकारकर्मीको जिम्मीसहित चार जनालाई मृत्युदण्डको सजाय सुनाइएको हो, उनीहरूलाई जेलको प्रक्रियाअनुसार फाँसी दिइने छ ।’

सैनिक सरकार, जुन्ताले गत वर्ष सत्ता कब्जा गरेपछि भएका झडप तथा दमनका क्रममा दर्जनौं ‘सैनिक विद्रोह’ विरोधी कार्यकर्तालाई मृत्युदण्डको सजाय सुनाएको हो । म्यानमारले सन् १९९० पछि अदालती प्रक्रियाबाट मृत्युदण्डलाइ सदर गरेको थिएन ।

गत नोभेम्बरमा गिरफ्तार भएका आङ सान सुचीको नेशनल लिग फर डेमोक्रेसीका सदस्य फियो जेया थाउलाई आतंकवाद विरोधी कानूनअन्तर्गत अपराधका लागि जनवरीमा मृत्युदण्डको सजाय सुनाइएको थियो ।

‘जिम्मी’ भनेर चिनिने प्रजातन्त्रवादी प्रसिद्ध अभियन्ता क्यो मिन युले पनि अर्थसैन्य न्यायिक निकायबाट सोही कसुरमा सजाय तोकिएको हो । मृत्युदण्डको कुनै मिति नतोकिएको प्रवक्ता तुनले बताए ।