काठमाडौं । प्रेस काउन्सिल नेपालले नेपाल आज डटकमलाई सूचीकरणबाट हटाएको छ । शुक्रबार एक सूचना जारी गर्दै अनैतिक सूचना सप्रेषण गरेको भन्दै सूचीकरणबाट हटाएको हो ।

आचारसंहिता अनुगमन उपसमिति बैठकले कालोसूचीमा राखेर सुध्रने अवसर दिँदा पनि नसुध्रेको भन्दै अनलाइनलाई सूचीकरणबाटै हटाउने निर्णय गरेको जनाएको छ ।

काउन्सिलद्वारा जारी विज्ञप्तिमा भनिएको छ, ‘काउन्सिलले कालोसूचीमा राखी सुध्रने अवसर प्रदान गरे पनि कुनै सुधार नआएको, काउन्सिललाई अवज्ञा गरी आधारहीन, वैयक्तिक चरित्र हत्या गर्ने, मानहानी गर्ने समाचार निरन्तर सम्प्रेषण गर्दै आएकोसमेत देखिएको हुँदा उक्त अनलाइन सञ्चारमाध्यमलाई सूचीकरणबाट हटाउने र नेपाल पत्रकार महासंघलगायतका सम्बद्ध संघसंस्थासँग छलफल गरी थप कारबाही गर्ने निर्णय भएको छ ।’

अनलाइनका सञ्चालक माधवप्रसाद गुरागाईंले एक महिला पत्रकारविरुद्ध हिंसा, ज्यादती, मानसिक यातना दिँदै आएकोसमेत विज्ञप्तिमा उल्लेख गरिएको छ ।