रौतहट । यो तस्विर रौतहटको बृन्दाबन नगरपालिकाको नगरसभा बन्दशत्रको हो । नगरको आगामी आर्थिक बर्षको राजस्व र ब्ययको अनुमान (वजेट) पेश गर्ने कार्यसूचीसहित नगरसभा असार ११ गते बोलाइएको थियो ।

तर नगरपालिकामा बहुमत रहेको नेकपा एकीकृत समाजवादीले नगरसभामा रहेका अन्य दललाई पेलेरै जाने योजनाका साथ जर्वजस्त बजेट पेश गर्ने निति लिएपछि उक्त नगरपालिकामा लफडा निम्तेको छ ।

लफडाकै बीच अन्तत नगरपालिकाका मेयर विनोद प्रसाद कुर्मी र उपप्रमुख संगीताकुमारी रामले प्रहरी प्रशासन लगाएरै बजेट पारित गरेको घोषणा गरेका छन् ।
यी दुवै नेकपा एकीकृत समाजवादीका निर्वाचित जनप्रतिनिधी हुन् । बहुमतको दम्भमा नेकपा एकीकृत समाजवादीले नगरसभामा रहेका माओवादी केन्द्र र एमालेलाई पाखा लगाएरै बजेट पारित भएको जर्वजस्ती घोषणा गरेका हुन् ।

स्थानीय सरकार सञ्चालन ऐन २०७४ को दफा ७१ को उपदफा १ तथा अन्तर सरकार वित्त ब्यवस्थापन ऐन २०७४ को दफा २१ को उपदफा ३ ले गाँउ कार्यपालिका र नगर कार्यकालिकाले प्रत्येक वर्ष असार महिनाको १० गतेभित्र आगामी आर्थिक बर्षको राजस्व र ब्ययको अनुमान सम्वन्धित गाँउ ÷नगरसभामा पेश गर्नुपर्ने प्रावधान छ ।
त्यसरी आर्थिक वर्षको राजस्व र ब्यायको अनुमान प्रस्तुत गर्दा शीर्षक छुटटाएर बजेट बनाउनु पर्ने हुन्छ । तर बृन्दाबन नगरपालिकाका मेयर उपमेयरले बजेटमा कुनै पनि शीर्षक नछुटाई सोलोडोलो एकमुष्ट बजेट घोषणा गरेपछि माओवादी केन्द्र र एमालेका जनप्रतिनिधीले विरोध जनाएका थिए ।

यो नगरपालिकामा कांग्रेस निल छ । माओवादी केन्द्रसँग १५, एमालेसँग ५ र एकीकृत समाजवादी एक्लैसँग २७ जनप्रतिनिधी नगरसभामा छन् ।

आफुसँग भएको त्यही वहुमतको बलमा एकीकृत समाजवादीले नगरसभामा बजेट प्रस्तुत गर्दा शीर्षक अनुसारको बजेट नछुटाई सोलोडोलो एकमुष्टमा घोषणा गरेका थिए ।

नगरसभा वाहिर स्थानीय जनताले पनि एकीकृत समाजवादीका जनप्रतिनिधीको यो शैलीको विरोध गरेका थिए । नगरसभाभित्र एमाले माओवादीका जनप्रतिनिधीको विरोध भईरहेकै थियो । तर स्थानीयको बाहिरी विरोध र माओवादी र एमाले जनप्रतिनिधीको नगरसभाभित्रको विरोधका वीचमा एक्काशी नगरसभाभित्र प्रहरी बोलाइयो ।
त्यसपछि चन्द्रनिगाहपुर इलाका प्रहरी कार्यालयबाट नगरसभामा पुगेका डिएसपी सन्तु जैसवालले नगरसभा बैठकभित्र बल प्रयोग गरे । विरोधमा रहेका जनप्रतिनिधीलाई छेकबार लगाउने र एकीकृत समाजवादीका जनप्रतिनिधीलाई हस्ताक्षरमा सघाउने काम गरे । त्यसपछि नगरसभाबाट बजेट पारित भएको घोषणा गरिएको थियो ।

जर्वजस्ती नगरसभाबाट आफुखुसी बजेट घोषणा गरेपछि जनप्रतिनिधीका वीचमा झनै टसल बढने देखिएको छ ।