काठमाडौँ । भारतका प्रसिद्ध व्यवहार वैज्ञानिक प्रोफेसर अफ एमिनेन्स डा. सञ्जीव पी. साहनीले ‘विद्यार्थी माझ व्यवहारजन्य दक्षता र कार्य सम्पादन अभिवृद्धि गरेर उनीहरूको सम्भावित क्षमतालाई अधिकतम बनाउने’ कुरामा जोड दिएका छन् । आइतबार काठमाडौंस्थित होटल मेरियटमा आयोजित एक प्रेस सम्मेलनमा उनले सो कुरा बताएका हुन् ।

कम्पिटेन्सी म्यापिङ प्रविधिमार्फत विद्यार्थीबीच विभिन्न सामाजिक, भावनात्मक र संज्ञानात्मक क्षमता अभिवृद्धि गर्नेबारे डा. साहनीले विस्तृतमा बताएका हुन् । यस्तै विद्याार्थीको शैक्षिक प्रदर्शन, भावनात्मक सन्तुष्टि र करियर सफलतालाई कसरी उनीको व्यवहारसम्बन्धी स्टिमुलाइले प्रभाव पार्दछ भनेर पनि व्याख्या गरेका थिए ।

‘विद्यार्थीहरूको सापेक्षिक सबल पक्ष र कमजोरीहरू बुझ्नु र तिनकै आधारमा उनीहरुले विकास गर्नुपर्ने मुख्य दक्षताहरू पहिचान गर्नु अत्यन्त आवश्यक हुन्छ, यो सबै विद्याार्थीहरुको टिमवर्क, नेतृत्व क्षमता र निर्णय लिने क्षमता जस्ता क्षेत्रहरूमा उनीहरुको कौशलता पहिचान गर्ने र तिनकै आधारमा सुधारात्मक संयन्त्र निर्माण गर्ने कुरासँग सम्बन्धित छ,’ डा. साहनीले भने । उनी हालै वल्र्ड सोसाइटी अफ भिक्टिमोलजीको उपाध्यक्षमा चुनिएका छन् ।

साहनीले ५० भन्दा बढी देशका दुई लाखभन्दा बढी विद्यार्थी, प्रधानाध्यापक, शिक्षक, उच्च सरकारी अधिकारीलगायत सम्बन्धी तालिम दिँदै आएका छन् । उनले अन्तर्राष्ट्रिय र राष्ट्रिय जर्नलमा ४० भन्दा बढी अनुसन्धानमूलक लेख प्रकाशित गरेका छन् ।