काठमाडौँ । साफ यू २० च्याम्पियनसिपअन्तर्गत नेपाल आफ्नो तेस्रो खेलमा भारतसँग ८-० गोलले पराजित भएको छ । भुवनेश्वरको कालिंगा स्टेडियममा भएको खेलमा घरेलु टोली भारतसँग फराकिलो गोल अन्तरले पराजित भएको हो ।

यसअघि नेपालले माल्दिभ्सलाई ४-० र श्रीलंकालाई ३-० गोलले पराजित गरेको थियो । पहिलो खेलमै बंगलादेशसँग २-१ ले पराजित भएको भारतले दोस्रो खेलमा श्रीलंकालाई ४-० ले हराएर पहिलो जित निकालेको थियो ।

खेलको ३२ औँ मिनेटमा टाइसन सिंह लवइटोङबामले गोल गर्दै भारतलाई अग्रता दिलाएका थिए । यस्तै, पार्थिव सुन्दर गोगोईले ५० औँ र ५२ औँ मिनेटमा गोल गरे ।

यसैगरी पथुम गिमहानाले ६४ औँ मिनेटमा गोल गर्दै भारतको अग्रता ४–० बनाए । ७१ औँ मिनेटमा हिमांशु जाँग्राले पेनाल्टीमा गोल गरे । यस्तै, मोहमेद रिकाज ७८ औं मिनेटमा गोल गरे, ९० औं मिनेटमा गुरकिरत सिंहले गोल गर्दै भारतलाई ७–० को अग्रता दिलाए । शुभो पउलले इन्जुरी टाइममा गोल गर्दै भारतलाई ८–० को जित दिलाए ।

भारतले आफ्नो तेस्रो खेलमा नेपाललाई भारी गोल अन्तरले पराजित गरेको हो । योसँगै शीर्ष दुईमा रहँदै भारतले फाइनलमा स्थान बनाउन सफल भएको छ ।