घटनास्थलमा ‘सुसाइड नोट’सँगै भेटियो आफन्तलाई पठाएको म्यासेज

काभ्रेस्थली घटना

घटनास्थलमा ‘सुसाइड नोट’सँगै भेटियो आफन्तलाई पठाएको म्यासेज

दया दुदराज २०७९ साउन १६ गते १५:२३

काठमाडौं । सोमबार बिहान १० बजे राजधानीको तारकेश्वर नगरपालिका २ स्थित काभ्रेस्थलीको एकै परिवारका ४ जनाको शव फेला परेको थियो ।

उपत्यका अपराध अनुसन्धानका अनुसार एकै परिवारका ४१ वर्षीय दिनेश पाण्डे, उनकी श्रीमती ३९ वर्षीया सुनिता पाण्डे, १३ वर्षीया छोरी आशिका पाण्डे र ८ वर्षीय आशिक पाण्डेको शव मृत अवस्थामा फेला परेको हो ।

प्रहरीको प्रारम्भिक अनुसन्धानबाट ४१ वर्षीय दिनेश पाण्डेले श्रीमती र छोराछोरीमाथि छुरा प्रहार गरेर आत्महत्या गरेको हुनसक्ने आशंका गरेको छ । प्रहरीले घटनास्थलबाट ४ पृष्ठ लामो ‘सुसाइड नोट’ र दिनेशले आफन्तलाई पठाएको म्यासेज फेला परेको घटनास्थलमा रहेको एक प्रहरी अधिकारीले मेरोन्यूजलाई बताए ।

ती प्रहरीले भने, ‘सुसाइड नोट’मा के छ, त्यो थाहा छैन, तर हामीले दिनेशले केही आफन्तलाई श्रीमतीसँगको विवादको विषयमा म्यासेज पठाएको फेला पारेका छौँ ।’

प्रारम्भिक जानकारीअनुसार दिनेश करिब १२ वर्ष कुवेतमा बसेर साढे ४ वर्षअघि स्वदेश फर्किएका थिए । तर पारिवारमा मेलमिलाप थिएन । दिनेश र सुनिता पारिवारिक झगडा लिएर तीन पटक प्रहरीको बालाजु वृत्तमा पुगेका थिए ।