काठमाडौँ । भक्तपुर प्रहरीले १२ वर्षदेखि फरार अभियुक्त प्रेमबहादुर रानालाई पक्राउ गरेको छ ।

०६७ मा दाङ साबिक सैघा गाविस २ कोइला बस्ती (हालको घोराही उपमहानगर १९) बस्ने ३२ वर्षका सूर्यबहादुर रानाको हत्या मुद्दामा दाङ देउखुरी जिल्ला अदालतबाट जन्मकैद (२० वर्ष) कैद सजाय फैसला भएको थियो ।

फरार रहेका उनलाई भक्तपुर प्रहरीले पक्राउ गरेको हो । रानालाई प्रहरी वृत्त ठिमीबाट खटिएको प्रहरी टोलीले ठिमी संगमचोक भक्तपुरबाट नियन्त्रणमा लिएको महानगरीय प्रहरी परिसर भक्तपुरले जनाएको छ ।

पक्राउपछि उनलाई जिल्ला अदालत भक्तपुरमा पेश गरेको परिसरका सूचना अधिकृत राजु पाण्डेले जनाए । रानालाई अदालतको आदेशले तोकिएको कैद भुक्तानका लागि कारागार कार्यालय जगन्नाथदेवल काठमाडौँ चलान गरिएको छ ।