काठमाडौँ । धरान आसपासमा यसपटक सयपत्री फूल समयमै नफुलेपछि व्यवसायीले सयपत्रीका तयारी माला भारतबाट भित्र्याएका छन् ।

कोलकाताबाट लाखौँको तयारी माला तिहारअगावै ल्याइएको कृषि बजारका व्यवस्थापक लक्ष्मण भट्टराईले जानकारी दिए । ल्याइएका माला व्यावसायीले धरान १३ स्थित कृषि बजारमा रहेको कोल्डस्टोर (शितघर)मा भण्डारण गरेका छन् ।

हाल एक लाख ५० हजार माला भण्डार गरिएको र थप ५० हजार माला भारतबाट आउँदै गरेको व्यवसायीले कृषि उपजबजारलाई जानकारी गराएको उल्लेख गर्दै उनले नेपाली बजारको फूलबाट एक लाख ५० हजारको माला आउन सक्ने बताए ।

यो वर्ष नेपालमा फूल फुल्ने समयभन्दा अघि तिहार आएकाले स्थानीय उत्पादनको फूल बजारमा कम आउने भएपछि व्यवसायीले तिहार अगाडि फूलको माला व्यवस्थापन गरेका हुन् ।

उनका अनुसार गत वर्ष एक करोड ६२ लाख फूलको व्यापार भएको थियो । तर, यस वर्ष दुई करोडभन्दा बढीको कारोबार हुने अनुमान गरिएको छ ।

‘ती फूलका माला प्रतिगोटा ४०–५० पर्न सक्छ, नेपाल यस क्षेत्रमा समयमै फूल नफुलेकाले ती माला प्रतिगोटा एक सयसम्म पर्न सक्छ,’ भट्टराईले भने ।

तिहार यही कात्तिक ५ गतेदेखि सुरु हुँदै छ । यो वर्षको तिहारलाई स्थानीयबासीले रोपेको फूलले काम नदिएको व्यवसायी विमल थापाले बताए ।