काठमाडौँ । पेरिस सेन्ट जर्मेन (पिएसजी) मार्चयता पहिलोपटक पराजित भएको छ । फ्रेञ्च लिग वानमा पिएसजी लेन्ससँग आइतबार राति ३–१ ले पराजित भएको हो ।

स्टार खेलाडी लियोनल मेसी र नेयमारबिना मैदानमा उत्रिएको पिएसजी फिनिसिङमा चुकेको थियो ।

दोस्रो स्थानको लेन्स पछिल्लो १७ खेलमा जम्मा एक खेलमा हार बेहोरेको छ । क्रिस्टोफ गाल्टियरको पिएसजीभन्दा लेन्स जम्मा चार अंकले पछि छ । लेन्सको जितमा लुइस ओपेन्डाले एक गोल गरे भने एक गोलको अवसर सृजना गरेका थिए । 

खेलको पाँचौ मिनेटमा फ्राङ्कओस्कीले भली बललाई गोलमा परिणत गरे । हुगो इकिटिकेले बराबरी गोल गरे फर्काए । २८ औँ मिनेटमा रक्षक मार्किन्होसलाई बिट गर्दै ओपेन्डाले २–१ को अग्रता दिलाए । दोस्रो हाफको दोस्रो मिनेटमै एलेक्सिस क्लाउडे मौउरिसले तेस्रो गोल गरेका थिए ।