काठमाडौं । यसबर्ष सबैभन्दा धेरै कमाई गर्ने नेपाली फिल्म ‘कबड्डी ४’ बनेको छ । चलचित्र विकास बोर्डले सार्वजनिक गरेको रिपोर्टका अनुसार २०७९ सालमा प्रदर्शनमा आएका फिल्महरुमध्ये २१ करोड ३८ लाख रुपैयाँ ग्रस कमाउँदै ‘कबड्डी ४’धेरै कमाउने नेपाली फिल्म बनेको हाे । फिल्मका ७ लाख ६६ हजार टिकट बिक्री भएको उक्त रिपोर्टमा उल्लेख छ ।

त्यस्तै, दोस्रो सर्वाधिक कमाउनेमा कन्नड फिल्म ‘केजीएफ २’रहेको छ । फिल्मले १९ करोड २९ लाख रुपैयाँ ग्रस कमाएको बोर्डले जनाएको छ । ‘छक्कापञ्जा ४’ तेस्रो स्थानमा परेको छ । फागुन तेस्रो साताबाट प्रदर्शनमा आएको फिल्मले १६ करोड ९४ लाख रुपैयाँ कलेक्सन गरेको बोर्डले जनाएको छ ।

नेपालमा नेपालीसहित रिलिज भएका १३२ वटा चलचित्रमध्ये ‘सिवानी’ सबैभन्दा थाेरै कमाउनेमा परेकाे छ । फिल्मले पाँचसय बीस रूपैया कमाइ गरेकाे बोर्डकाे तथ्याङ्कमा उल्लेख छ ।