काठमाडौँ । निःशुल्क आँखा शिविरमा परीक्षण गरिएका ४ प्रतिशत बालबालिकामा दृष्टिदोषको समस्या पाइएको छ । नेपाल नेत्रज्योति संघ र अर्विसको सहकार्यमा सञ्चालित नेपाल रिच परियोजनामा करिब ८ लाख बालबालिकाहरुमा परीक्षण गरिएको थियो ।

परियोजनाअन्तर्गत झापा, मोरङ, पर्सा, सुनसरी र सिराहा जिल्लाका ७ लाख ८५ हजार ४६० जना बालबालिकाको निस्शुल्क आँखा परिक्षण गरिएको हो । सन् २०१८ देखि २०२२ सम्म चलेको परियोजनामार्फत ६ देखि १८ वर्षसम्मका विद्यालय जाने र नजाने बालबालिकाहरुको आँखा परीक्षण गरिएको थियो ।

त्यसैगरी ४ वर्षको अवधिमा २ हजार ५ सय ५५ वटा निजी तथा सामुदायिक विद्यालयहरुमा आँखा जाँच गरिएको थियो ।

जाँचका क्रममा दृष्टिमा समस्या देखिएका २० हजार ३ सय ८० जना बालबालिकाहरुलाई निःशुल्क चस्मा वितरण गरिएको साथै २०१ जना बालबालिकाको आँखाको निःशुल्क शल्यक्रिया गरिएको छ ।