काठमाडौँ । अर्थमन्त्री डा. प्रकाशशरण महतले आगामी आर्थिक वर्ष २०८०/०८१ को बजेट संशोधन नभई पास हुने दाबी गरेका छन् ।

सत्ता गठबन्धन दलकै सांसदहरूले बजेट संशोधन गरेपछि मात्रै पास गर्न दिने बताउँदै गर्दा मन्त्री महतले सोमबार संसद भवनबाहिर सञ्चारकर्मीसँग कुरा गर्दै यस्तो बताएका हुन् ।

‘बजेट पास हुन्छ त्यसमा दुई मत छैन, थोरै साधन श्रोत, आवश्यकता धेरै यो आजको वास्तविकता हो, आजको सम्भावित श्रोत साधनलाई मध्यनजर गरेर नै बजेट ल्याएको हो,’ उनले भने ।

उनले बजेट असार १३ गते कुनै पनि संशोधनबिना पास हुने बताएका हुन् । उनले आफूले बजेट ल्याउँदा सिमित श्रोत, साधनलाई मध्यनजर गरेर ल्याएको भन्दै उनले आजको वास्तविकतामा बजेट आएको दाबी गरे ।

उनले बजेटमा समानता भएन भन्ने सांसदहरुको भनाइ आफूले मागेअनुसारको नआएको भन्नेमा मात्रै सिमित रहेको बताए । उनले बजेटको सीमाभित्र रहेर सम्बोधन गर्नु पर्ने ठाउँमा सम्बोधन हुने दाबी गरे ।

मन्त्री महतले बजेट ल्याउनुपूर्व धेरै छलफल गरेर ल्याइएको भन्दै विधिभित्र रहेर पास हुने बताए ।