काठमाडौँ । एसिया कपको पहिलो खेलमा पाकिस्तानले घरेलु मैदानमा ठूलो अन्तरको जित हात पारेको छ । पहिलो पटक एसिया कपमा पुगेको नेपाललाई पाकिस्तानले २३८ रनले पराजित गरेको हो ।

टस जितेर पहिला ब्याटिङ रोजेको पाकिस्तानले कप्तान बाबर आजाम र इफ्तिकर अहमतको शतकमा ६ विकेट गुमाएर ३४२ रन बनाएको थियो ।

३४३ रनको लक्ष्य पच्छ्याएको नेपाल २३ ओभर ४ बलमा १०४ रन बनाएर अलआउट भयो ।

नेपालका लागि सोमपाल कामीले २८, आरिफ शेखले २६ र गुल्सन झाले १३ रन बनाउनु बाहेक अन्य ब्याट्सम्यानले दोहोरो अंकमा रन बनाउन सकेनन् ।

साहिन साह अफ्रिदीले पहिलो ओभरमै ओपनर कुशल भुर्तेल र कप्तान रोहित पौडेललाई आउट गरेका थिए । पहिलो ओभरको पाँचौ बलमा भुर्तेल आउट भए ।

उनले ५ बलमा ८ रन बनाए । कप्तान पौडेल पहिलो बलमै आउट भए ।

दोस्रो ओभरको चौँथो बलमा नसिम शाहले आशिफ शेखलाई आउट गरे । शेखले ५ बलमा ५ रन बनाए ।

१४ ओभर चार बलमा आरिफ शेख आउट भए । उनलाई ह्यारिस रफले आउट गरे । शेख ३८ बलमा २६ रन बनाएर आउट भए ।