काठमाडौं । सिप बिल्डिङमा अनुत्तीर्ण भएकाहरूका लागि रोजगार अनुमति प्रणाली (ईपीएस) आवेदन खुलेको छ ।

ईपीएस कोरिया शाखाले उत्पादनमूलक क्षेत्रका लागि आवेदन फाराम खुला गरेको हो ।

उनीहरूलाई पुस १३ गते बिहान १० बजेदेखि ३ बजेसम्म ईपीएस शाखा ग्वार्कोमा सक्कल पासपोर्ट, पासपोर्ट साइजको फोटो, सिप बिल्डिङ परीक्षाको प्रवेशपत्र र तोकिएको शुल्क लिई सम्पर्क गर्न अनुरोध गरेको छ ।

ईपीएस शाखाले मंसिर १९ गते उत्पादनमूलक क्षेत्रका लागि कोरियन भाषा परीक्षाको आवेदन फाराम भर्न सूचना प्रकाशन गरिएको थियो । । उक्त सूचनामा सन् २०२३ भित्र अन्य क्षेत्र तर्फ कोरियन भाषाको परीक्षाको लागि आवेदन दिएका आवेदकहरुले उत्पादनमूलक क्षेत्रमा फाराम भर्न नपाउने भनिएको थियो ।

उक्त सूचनाकाविरुद्ध सिप बिल्डिङ परिक्षामा सामेल भएका आवेदकहरूमध्ये सुरज पाठक सहित १८ जनाले उक्त परीक्षा आवेदन फाराम भर्न पाउनुपर्ने माग राख्दै उच्च अदालत पाटनमा निवेदन पेस गरेका थिए ।

सो निवेदनमा उच्च अदालत पाटनले पुस ५ गते अन्तरिम आदेश जारी गर्दै निवेदकहरुलाई फाराम भर्न रोक नलगाउनु र निवेदकहरूलाई आवेदन फाराम भर्न दिनु भनी आदेश दिएको थियो ।