काठमाडौँ । सरकारले हेटौंडा सिमेन्ट उद्योगको अध्यक्षमा हेटौंडाका नरेन्द्र भण्डारीलाई नियुक्त गरेको छ ।मन्त्रिपरिषद्को बिहीबार बसेको बैठकले सिमेन्ट उद्योगको अध्यक्षमा भण्डारीलाई नियुक्त गर्ने निर्णय गरेको सरकारको प्रवक्ता रेखा शर्माले जानकारी दिइन् ।

यस्तै औद्योगिक क्षेत्र व्यवस्थापन लिमिटेडको महाप्रबन्धकमा पदम ओली, अन्तर्राष्ट्रिय सम्मेलन केन्द्रको कार्यकारी निर्देशकमा तेजबहादुर राईलाई नियुक्त गरिएको छ ।

नवनियुक्त हेटौंडा सिमेन्ट उद्योगका अध्यक्ष भण्डारीले उद्योगको अवस्था नाजुक र चुनौतीपूर्ण अवस्थालाई सुधार गर्ने जिम्मेवारी पाएको प्रतिक्रिया जनाए ।

‘हेटौंडा सिमेन्टको वर्तमान अवस्थाप्रति म दुई दशकदेखि प्रत्यक्ष रुपमा जानकार छु । उद्योगको अवस्था नाजुक छ । यो चुनौतीपूर्ण अवस्थामा उद्योगलाई सुधार गर्ने जिम्मेवारी पाएको छु,’ उनले कान्तिपुरसित भने, ‘सरकारले जुन विश्वास गरेको छ । त्यो विश्वासलाई म पूरा गर्नेछु ।’

हेटौंडा सिमेन्ट उद्योगको नियमित उत्पादन छैन । झन्डै ३० कर्मचारी–श्रमिक नियमित तलब, उपदान र सेवासुविधाको माग राख्दै महिनौंदेखि धर्नामा छन् ।