हेटौंडा । बागमती गाउँपालिकाको गाउँसभा उपाध्यक्ष फणिन्द्र तिमल्सिनासहित ४ वडाध्यक्षले बहिस्कार गरेका छन् ।  गाउँपालिका अध्यक्षले मनोमानी ढंगले बजेट ल्याएको, वडालाई बजेट सिलिङ उपलब्ध नगराएको भन्दै उपाध्यक्ष र वडाध्यक्षहरुले गाउँसभा बहिष्कार गरेको बताएका हुन् ।

नीति तथा कार्यक्रम र बजेटप्रति उपाध्यक्ष र केही वडा अध्यक्षले असन्तुष्टि व्यक्त गर्दै उपाध्यक्ष तिमल्सिना र वडाध्यक्षले असन्तुष्टि जनाएका हुन् । उनीहरूले गाउँपालिकाको कार्यालय अगाडि बिरोध प्रदर्शन गरेका थिए भने हेटौंडामा पत्रकार सम्मेलन समेत गरेका थिए ।

गाउँपालिका अध्यक्ष घलान र प्रमुख प्रशासकीय अधिकृत झम्कनारायण घलानले एकलौटी र मनलाग्दी गरेको उनीहरूको आरोप छ । गाउँपालिकाका अध्यक्ष घलानले भने बजेट निर्माणको प्रक्रियामै रहेको र नीति तथा कार्यक्रम प्रस्तुत गर्ने समयमा बजेटको कुरा गरेर विरोध गर्नु उचित नभएको उनीहरुले बताए । प्राथमिकता पहिचान गरेर योजना छनोट गर्ने विषयगत समितिहरू मार्फत योजना तर्जुमा गर्ने प्रक्रिया जारी रहेको उनीहरूको भनाई छ ।

बजेट वक्तव्य ल्याउने अघिल्लो दिन आइतबार नै प्रेस विज्ञप्ति जारी गर्दै गाउँपालिकाका उपाध्यक्ष तिमल्सिनाको नेतृत्वले नीति तथा कार्यक्रमप्रति आपत्ति जनाउँदै असन्तुष्टि जनाएका थिए । नेपालको संविधान २०७२ र स्थानीय सरकार सञ्चालन ऐन २०७४ मा व्यवस्था भए बमोजिम उपाध्यक्ष, वडाध्यक्ष, कार्यपालिका सदस्य हक अधिकारमा प्रत्यक्ष हस्तक्षेप गरी नीति तथा कार्यक्रम ल्याएकोमा उनीहरुले आपत्ति जनाएका छन् ।

उपाध्यक्ष तिमल्सिनासहित ६ नम्बर अध्यक्ष टेकबहादुर डिम्डुङ, ७ का अध्यक्ष उत्तरबहादुर भोलन, ८ का अध्यक्ष इन्द्रमणि तिमल्सिना र ९ का अध्यक्ष पुनराम घलान तथा कार्यपालिका सदस्य डम्बरबहादुर विकले गाउँपालिकाको नीति कार्यक्रमप्रति असन्तुष्टि जनाएका हुन् ।

बजेटमा उपाध्यक्षलाई समेत सिलिङ बजेट राखिनुपर्ने, उपाध्यक्ष, वडाध्यक्ष र कार्यपालिका सदस्यको हक अधिकारमा हस्तक्षेप गर्न नहुने लगायतका माग राखिएको छ ।