काठमाडौं । साउथ स्टार अल्लु अर्जुन यतिबेला आफ्नो बहुप्रतिक्षित फिल्म ‘पुष्पा २’ लाई लिएर चर्चामा छन् । यसैबीच, निर्देशक निखिल आडवाणीले अल्लुको बारेमा एक खुलासा गरेपछि साउथ र बलिउडबीचको बहस फेरि सुरु भएको छ ।

आडवाणीले हालै एक अन्तर्वार्तामा अल्लु अर्जुनले बलिउडबारे बोलेको बताएका थिए । उनले भने ‘अल्लुलाई बलिउडमा सबैभन्दा ठूलो कमजोरी के देख्नुहुन्छ ? भनि सोध्दा उनले बलिउडमा हिरो कसरी बन्ने भनेर सबैले बिर्सिएको प्रतिकृया दिएका थिए ।’

निर्देशक आडवाणीले भने, ‘पहिले बलिउडमा उत्कृष्ट फिल्म बनाइन्थ्याे । अमिताभ बच्चनको ‘कालिया’ र’कुली’ यसको उदाहरण हुन्। तर अहिले यस्ता फिल्म कसरी बनाउने भन्ने बिर्सेका छन् । जबकि साउथ फिल्महरूले वीरताको भावनालाई गहिरो रूपमा बुझेका छन् र सही ढंगले चित्रण गर्न सफल भएका छन्। साउथका फिल्ममा सबै विषयलाई उत्कृष्ट एक्सन र हिरो इमेजका साथ प्रस्तुत गरिन्छ, जसलाई दर्शकले निकै रुचाएका छन् ।’

गत वर्ष ‘जवान’, ‘गदर २’ र ‘एनिमल’ जस्ता हिट फिल्महरूले बलिउडको दबदबा बनाएको थियो। तर यो वर्ष अहिलेसम्म कुनै पनि फिल्मले बक्स अफिसमा सफल हुन सकेको छैन । यो वर्ष साउथको फिल्म ‘कल्की २८९८ एडी’ अहिलेसम्मकै सबैभन्दा धेरै कमाउने फिल्म बनेको छ । अल्लु अर्जुनको फिल्म ‘पुष्पा २’ यसै वर्षको डिसेम्बर ६ मा रिलिज हुँदैछ ।