काठमाडौं । अनमोल केसीको शीर्ष अभिनय रहने फिल्म ‘जेरी अन टप’ को छायांकन सुरु भएकाे छ। सोमबार पाटनको मन्दिरमा शुभमुहूर्त गर्दै निर्माण टिमले फिल्मको छायांकन थालेको हो ।

सुयोग गुरूङको निर्देशन रहने यो फिल्ममा अनमोलसहित जसिता गुरूङ, आँचल शर्मा, भुवन केसी, विपना थापा, केदार घिमिरे (माग्नेबुढा), सुरक्षा पन्त, निर्मल शर्मा लगायत कलाकारहरूको अभिनय रहनेछ।

फिल्मबाट अभिनेता भुवन केसीले तीन वर्षपछि अभिनयमा पुनरागमन गर्न लागेका हुन्। ५० दिनको छायांकन तालिका राखिएको फिल्मलाई काठमाडौं, लुक्ला र भारतको लद्दाखमा छायांकन गरिने बताइएको छ ।

अनन्या फिल्म्स र भण्डारी मल्टिट्रेडको ब्यानरमा निर्माण हुने फिल्मलाई सरोज न्यौपानेले निर्माण गर्न लागेका हुन् ।

लभस्टोरी जनरामा बन्न लागेको फिल्मको प्रदर्शन भ्यालेन्टाइन डेको अवसर पारेर फागुन २ गतेलाई तय गरिएको छ।