काठमाडौं । मलेसियामा जारी यू-१९ महिला विश्वकपमा नेपालकी कप्तान पूजा महतो हालसम्म सर्वाधिक विकेट लिने बलर बनेकी छन् ।

आज भइरहेको मलेसियासँगको प्लेअफ खेलमा ४ विकेट लिँदै उनी सर्वाधिक विकेट टेकरको पहिलो स्थानमा उक्लिएकी हुन् ।

जारी प्रतियोगितामा पूजाले अहिलेसम्म ९ विकेट लिएकी छन् । आजको खेलअघि पूजा ५ विकेट लिएर सर्वाधिक विकेट लिनेको सूचीमा १६ औं स्थानमा थिइन् ।

जोहर क्रिकेट एकेडेमी ओभल, जोहरमा पहिले ब्याटिङ गरेको मलेसिया १६.५ ओभरमा अलआउट हुँदै ४५ रन बनाएकाे छ ।

मलेसियाका लागि नुरिमानले १५ रन बनाइन् । अन्य कुनै ब्याटरले ५ रन माथि बनाउन सकेनन्। तीन ब्याटर शून्य रनमै आउट भए।

समूह ‘डी’ मा रहेकाे नेपाल यसअघि नेपाल बंगलादेश, स्कटल्यान्ड र अस्ट्रेलियासँग पराजित भएको थियो। उता समूह ‘ए’ मा रहेकाे मलेसिया भारत, श्रीलङ्का र वेस्ट इण्डिजसँग पराजित भएको थियो ।

सुपर ६ बाट बाहिरिसकेका दुवै टोली अब प्लेअफमा भिड्न लागेका हुन्।