म्याग्दी। म्याग्दीको मङ्गला गाउँपालिका–३ सातबिसेमा १० वर्ष अमेरिकामा पढेर फर्किएका एक जना युवाले व्यवसायिक केरा खेती गरेका छन् ।

हाल बागलुङमा बसोबास र काठमाडौंमा ब्यवसाय गर्ने ३८ वर्षीय शुशिल खड्काले जन्मथलोमा पुर्ख्यौली जग्गालाई सदुपयोग गर्न केरा खेती सुरु गरेका हुन् ।

मङ्गला भेञ्चर कम्पनी मार्फत केरा खेती गरेर बाझिन थालेको खेतीयोग्य जमिनलाई सदुपयोगका साथै कृषि उद्यमबाट गाउँघरमै आम्दानी र रोजगारीको अवसर भएको सन्देश दिने प्रयास गरेका छन् ।

अमेरिकाको भेण्डेरबिल्ट विश्व विद्यालयबाट अर्थशास्त्र र ब्यवसाय विषयमा स्नाकोत्तर तथा ईञ्जिनियरीङमा स्नातक गरेका खड्काको सातबिसेमा एक सय रोपनी पुरख्यौली जग्गा छ । सन् २००५ मा अध्ययनका लागि अमेरिका गएका शुसील सन् २०१४ मा नेपाल आएका थिए ।

तीन रोपनीमा एक सय ५० बोट हजारी जातको केराबाट उद्यम शुरु गरेका खड्काले हालै एक रोपनीमा नयाँ केराका बिरुवा रोपेर विस्तार गरेका छन् । केराखेतीको परिक्षण सफल भएपछि विस्तार गर्न थालेका हुन्।

आधुनिक उपकरणको प्रयोग गरेर कम लागतमा रैथाने गौरीया जातको धान खेतीलाई निरन्तरता दिने र विदेशबाट फर्किएका तथा गाउँमै भएका बेरोजगार युवाहरुको समूह बनाएर कृषि उद्यम सञ्चालन गर्ने खड्काको योजना छ ।