काठमाडौं । गुजरातको अहमदाबादमा बिहीबार एउटा ठूलो विमान दुर्घटना भएको छ। अहमदाबादबाट लण्डन जाँदै गरेको एयर इन्डियाको विमान उडान भर्ने बित्तिकै दुर्घटनाग्रस्त भएको हो ।

विमानमा लगभग २४२ जना सवार रहेको बताइएको छ। यसैबीच, विमान दुर्घटनाकोबारे महत्त्वपूर्ण जानकारीप्राप्त भएकाे छ । भारतीय सञ्चारमाध्यम आजतकका अनुसार दुर्घटना हुनुभन्दा ठीकअघि विमानका पाइलटले नजिकैको एटीसीलाई संकेत पठाएका थिए, जसले खतराको संकेत गरिरहेको थियो र त्यसको केही क्षण पछि विमान दुर्घटनाग्रस्त भयो।

डीजीसीएले दिएकाे जानकारी अनुसार विमानले अहमदाबाद विमानस्थलको रनवे २३ बाट दिउँसो १:३९ बजे उडान भरेको थियो। उडान भर्ने बित्तिकै, यसले नजिकैको एटीसीलाई मेडे कल गर्‍यो, तर त्यसपछि विमानले एटीसीलाई कुनै संकेत दिएन। र उडान सुरु भएको केही सेकेन्डमै, विमान विमानस्थल परिसर बाहिर खस्यो।

विमानमा २ पाइलट र १० क्याबिन क्रू सहित कुल २४२ जना सवार थिए। विमानका क्याप्टेन सुमित सभरवालसँग ८,२०० घण्टाको उडान अनुभव थियो । सह–विमान चालक (को–पाइलट) सँग १,१०० घण्टाको उडान अनुभव थियो ।