धनगढी। कैलाली जिल्ला कारागारमा एक कैदीको रहस्यमय मृत्यु प्रकरणमा प्रहरी नायब निरीक्षक (सई) हरजीत नाथलाई नेपाल प्रहरीले पक्राउ गरेको छ।

डडेल्धुराका २८ वर्षीय हरिस सिंह पालीको मृत्युपश्चात् परिवारले उठाएको आरोप र किटानी जाहेरीका आधारमा जिल्ला प्रहरी कार्यालय कैलालीले सई नाथलाई नियन्त्रणमा लिएको हो।

पीडित पक्षले दिएको किटानी जाहेरीअनुसार सई नाथलाई पक्राउ गरी अनुसन्धानका लागि हिरासतमा राखिएको प्रहरीले जानकारी दियाे।

डडेल्धुराको भागेश्वर गाउँपालिका–५ का २८ वर्षीय हरिसको कैलाली कारागारमा मृत्यु भएको थियो। मृतककी श्रीमती जानकी साउँदले सई नाथकै योजनामा कारागारभित्र कुटपिट गरि श्रीमानको हत्या गरिएको आरोप लगाउदै किटानी जाहेरी दिएकी थिइन्।