काठमाडौं – आईसीसी टी–२० विश्वकपको सुपर–८ अन्तर्गतको खेलमा भारतले जिम्बाब्वेलाई २५७ रनको विशाल लक्ष्य दिएको छ । टस हारेर ब्याटिङको निम्तो पाएको भारतले निर्धारित २० ओभरमा चार विकेट गुमाएर २५६ रन बनायो ।

भारतका लागि अविशेष शर्मा र हार्दियक पाण्ड्याले अर्धशतकिय इनिङ्स खेले । अविशेषले ३० बलमा ४ चौका र ४ छक्कासहित ५५ रन बनाउँदा पाण्ड्याले २३ बलमा नटआउट ५० रन बनाए । यस्तै तिलक बर्माले १६ बलको सामना गर्दा ३ चौका र ४ छक्को मदतमा ४४ रन बनाए । इसान किनसले ३८, कप्तान सुर्यकुमार यादवले ३३, सञ्जु सैमसनले २४ रन बनाए ।

जिम्बाब्वेका लागि सिकन्दर रजा, रिचर्ड नागरावा, ब्लेसिंग मुजारबानी र टिनोटेन्डा मापोसाले एकएक विकेट लिए ।

सुपर–८ अन्तर्गत समूह ‘एक’का भारत र जिम्बावे अंकबिहीन छन् । आजको खेल गुमाउने टिम विश्वकपबाट बाहिरिने छ । त्यसैले आयोजक भारतमाथि आजको खेल जित्नैपर्ने दबाब छ। समूह चरणमा उत्कृष्ट प्रदर्शन गरेको जिम्बाबेका लागि समेत आजको खेल जितेर सेमिफाइनल यात्रा सहज बनाउनुपर्ने दबाब छ।

२० राष्ट्र सहभागी प्रतियोगिताबाट आयोजक भारत र श्रीलंकासहित जिम्बावे, वेस्ट इन्डिज, दक्षिण अफ्रिका, पाकिस्तान, इंग्ल्यान्ड र न्युजिल्यान्ड सुपर८ मा पुगेका हुन्। सुपर–८ मा पुगेका टोलीमध्ये समूह एकमा भारत, दक्षिण अफ्रिका, वेस्ट इन्डिज र जिम्बावे तथा समूह ‘दुई’मा इंग्ल्याण्ड, न्युजिल्याण्ड, पाकिस्तान र श्रीलंका रहेका छन्।