काठमाडौं। आईसीसी टी–२० विश्वकपको सुपर–८ अन्तर्गत आज समूह ‘दुई’का इंग्ल्यान्ड र न्युजिल्यान्ड प्रतिस्पर्धा गर्दैछन् । यो खेल साँझ ७ बजेर १५ मिनेट जाँदा श्रीलंकाको कोलम्बोमा सुरु हुँदैछ।

सुपर–८ अन्तर्गत समूह ‘दुई’बाट एक खेल अगाडि नै इंग्ल्यान्ड सेमिफाइनल प्रवेश गरिसकेको छ । आजको खेलमा न्युजिल्यान्ड विजयी भए शीर्ष स्थानमा रहँदै यी दुई टिम यो समूहबाट सेमिफाइनल प्रवेश गर्नेछन् । आजको खेलमा न्युजिल्यान्ड पराजित भए अर्को खेलको नतिजा कुर्नुपर्ने हुन्छ ।

सेमिफाइनल प्रवेशका लागि आजको खेल न्युजिल्यान्डका लागि महत्त्वपूर्ण छ । यो समूहमा इंग्ल्यान्डले दुई खेलमा निरन्तर जित निकाल्दै चार अंक जोड्दा न्युजिल्यान्डले भने एक खेलमा अंक बाँडेर अर्को जित निकाल्दै तीन अंक बनाएको छ । अंक तालिकामा इंग्ल्यान्ड शीर्ष स्थानमा छ भने न्युजिल्यान्ड दोस्रो स्थानमा छ ।

२० राष्ट्र सहभागी प्रतियोगिताबाट आयोजक भारत र श्रीलंकासहित जिम्बावे, वेस्ट इन्डिज, दक्षिण अफ्रिका, पाकिस्तान, इंग्ल्यान्ड र न्युजिल्यान्ड सुपर–८ मा पुगेका हुन्।सुपर–८ मा पुगेका टोलीमध्ये समूह एकमा भारत, दक्षिण अफ्रिका, वेस्ट इन्डिज र जिम्बावे तथा समूह ‘दुई’मा इंग्ल्याण्ड, न्युजिल्याण्ड, पाकिस्तान र श्रीलंका रहेका छन्।