काठमाडाैं । गण्डकी प्रदेशका एक सांसदले पदबाट राजीनामा दिएका छन्। कांग्रेसका प्रदेशसभा सदस्य दोर्णकुमार कुँवरले राजीनामा दिएका हुन्।

बागलुङ–२ (ख) बाट प्रत्यक्ष निर्वाचित कुँवरले गण्डकी प्रदेशसभाका सभामुखलाई सम्बोधन गर्दै बुधबार राजीनामा बुझाएका छन्।

गण्डकी सरकारमा बुधबार मन्त्रिपरिषद हेरफेर हुँदा कुँवरले पनि मन्त्री बन्ने इच्छा व्यक्त गरेका थिए । तर मुख्यमन्त्री एवं दल नेता सुरेन्द्रराज पाण्डेले उनलाई मन्त्री बनाउन इन्कार गरेपछि राजीनामा दिएको स्राेतले जानकारी दियाे ।

२०७९ को प्रदेश सभा निर्वाचनमा कुँवर बागलुङ– २ (ख)बाट सांसद निर्वाचित भएका थिए । राजीनामा पत्रमा उनले आफूलाई मत दिएर विजयी गराउने मतदाता र अवसर दिने पार्टी नेतृत्वलाई धन्यवाद दिएका छन् । मतदाताको विश्वास अनुसार पूर्ण कार्यकाल सम्पन्न गर्न नसकेकोमा उनले क्षमा पनि मागेका छन् ।