काठमाडौँ । कुशल भुर्तेल र दिपेन्द्र सिंह ऐरीले नेपालका लागि टी–२० को सर्वाधिक रनको साझेदारी गरेका छन् । उनीहरूले आइसीसी टी–२० विश्वकप ग्लोबल छनोटअन्तर्गत फिलिपिन्सविरुद्धको खेलमा एक सय ७१ रनको साझेदारी गरेका हुन् ।

ओमानको अल अमेरात क्रिकेट मैदानमा टस हारेर पहिले ब्याटिङ गरेको नेपालले निर्धारित २० ओभरमा ३ विकेट गुमाएर दुई सय १८ रन जोड्यो । जसमा कुशल एक सय ४ रनमा अविजित रहे ।

कुशलले ६१ बल खेल्दा १३ चौका र १ छक्का हिर्काए । यस्तै, दिपेन्द्रले ८३ रन जोडे । उनले ४७ बलमा ६ चौका र ४ छक्का हिर्काए ।

कुशल नेपालबाट शतक बनाउने तेस्रो खेलाडी हुन् । यसअघि नेपालबाट ज्ञानेन्द्र मल्लले ५५ बलमा एक सय ७ रन र पारस खड्काले ५२ बलमा एक सय ६ रन बनाएका थिए ।

यसैगरी, यसअघि पारस खड्का र आरिफ शेखले सिंगापुरविरुद्ध एक सय ४५ रनको साझेदारी गरेका थिए ।