काठमाडौं । आईसीसी टी–२० विश्वकपको ग्लोबल छनोटको सेमिफाइलनमा पराजित भएसँगै नेपालको विश्वकपमा पुग्ने सपना तुहिएको छ ।

समूह चरणको खेलमा तीनै खेल जितेर समूह विजेता भई सेमिफाइनलमा पुगेको नेपालले यूएईसँग पराजित भएसँगै विश्वकप खेल्नबाट चुकेको छ ।

ओमानको मस्कटस्थित अल अमेरत क्रिकेट मैदानमा टस जितेर पहिले ब्याटिङ रोजेको यूएईले नेपालसामु १ सय ७६ रनको चुनौति प्रस्तुत गरेको थियो ।

नेपाल १८.४ ओभर खेल्दा सबै विकेट गुमाउँदै मात्र १ सय ७ रनमा समेटियो ।

समूह चरणको खेलमा उत्कृष्ट प्रदर्शन गरी नेपाल सेमिफाइनलमा प्रवेश गरेपछि नेपाल ८ वर्षपछि पुनः विश्वकप खेल्न आशा गरिएको थियो ।

यूएईसँगको खेलमा पहिलो ओभरमै दुई विकेट गुमाएको नेपालका आसिफ शेख चौथो बलमा र लोकेश बम पाँचौ बलमा सून्य रनमा आउट भए ।

तीन ओभरमा रहँदा कुशल भुर्तेल मात्रै ७ रनमा आउट भए भने आरिफ शेख ११ रनमा मैदानबाट बाहिरिए ।

दीपेन्द्रसिंह ऐरी र ज्ञानेन्द्र मल्लले नेपालको इनिङ्स उकास्न खोजे पनि सफल भएनन् । दीपेन्द्र ३८ रन र ज्ञानेन्द्र २० रन जोडेर आउट भए ।

नेपालको आशा राखिएका खेलाडी कप्तान सन्दीप लामिछाने मात्र ४ रनमा आउट भए भने विवेककुमार यादव ८ रनमा पेभेलियन फर्किए । कमलसिंह ऐरी ४ रन र जितेन्द्र मुखिया ५ रनमा आउट भए भने अविनास बोहोराले नट आउट १ रन जोडेका थिए ।