काठमाडौं । राजधानीमा जारी सहिद स्मारक ‘बी’ डिभिजन लिग अन्तर्गत शनिवार भएको खेलमा बाँसबारी क्लबले गोलको वर्षा गरेको छ ।

बाँसबारीले मध्यपुर युथ एसोसियसनमाथि ६–० को फराकिलो जित निकालेको हो । पहिलो हाफमा १–० ले अग्रता लिएको बाँसबारीले दोस्रो हाफमा लगातार पाँच गोल थप्यो । २३ औं मिनेटमा सञ्जय धिमालले गोल गर्दै बाँसबारीका लागि सुरुआती अग्रता दिलाएका थिए ।

बाँसबारीका राजेश पौडेलले ५१औं, ६४औं र ७८औं मिनेटमा गोल गरेर ह्याट्रिक पूरा गरे । ६२औं मिनेटमा सञ्जयले नै ब्यक्तिगत दोस्रो गोल गर्दा ७१ औं मिनेटमा सुलेमान थापामगरले अर्को गोल गरेपछि बाँसबारी ६–० ले विजयी भयो ।

४ खेल खेलेको बाँसबारीले ४ अंक जोड्दा मध्यपुरको समान चार खेलबाट ३ अंक रहेको छ ।

ललितपुरस्थित अखिल नेपाल फुटबल संघ (एन्फा) मुख्यालयको मैदानमा शनिवार नै भएको अर्को खेलमा बीरगञ्ज युनाइटेड र रानीपोखरी कर्नर टिम (आरसिटी) ले २–२ गोलको बराबरी खेलेका छन् ।

३३ औं मिनेटमा विज्ञान चौधरीले गोल गर्दै बीरगञ्जलाई अग्रता दिलाएका थिए । तर, ४१ औं मिनेटमा अमर डंगोलले गोल गर्दै आरसिटीलाई १–१ गोलको बराबरीमा फर्काए ।

पहिलो हाफको इन्जुरी समयमा बीरगञ्जले कृपाकान्त महतो थारुको गोलबाट पुन अग्रता बनाए पनि ८३ औं मिनेटमा अमरले व्यक्तिगत दोस्रो गोल गर्दै आरसिटीलाई २–२ गोलको बराबरीमा ल्याउदै हारबाट जोगाउन सफल भए । यस बराबरीसँगै आरसिटीले ४ खेलमा ५ अंक जोडेको छ । बीरगञ्जले ४ खेलमा ५ अंक नै जोडेको छ ।

यस्तै, तीन खेलबाट तालिकामा शीर्षता कायम गरेको चर्चब्वाइजले शनिबार श्री कुमारी क्लबसँग १–१ गोलको बराबरी खेल्दै अंक बाँडेको छ ।