काठमाडौं । जिल्ला प्रहरी कार्यालय मोरङले सर्वसाधरणहरूले गरेको प्रदर्शनको भिडियो खिचेको भन्दै ११ जनालाई पक्राउ गरेको छ । मोरङ प्रहरीले एक जना पत्रकार, दुई जना युटुबरसहित ११ जनालाई भिडियो खिचेको भन्दै पक्राउ गरेको छ।

गत शुक्रबार मोरङ सुन्दरहरैंचा-७ की डेढ वर्षीया नाबालिकाको बलात्कारपछि हत्या भएको विरोधमा स्थानीयबासीले राजमार्ग चक्काजाम गरेका थिए। सोही प्रदर्शनको भिडियो खिचको भन्दै पत्रकार सहित ११ जनालाई पक्राउ गरेको हो ।

स्रोतका अनुसार भिडियो खिच्ने पत्रकार सम्झना राई र अन्य दुई जना युट्युबरसहित ११ जनालाई प्रहरीले मंगलबार साँझ गछियाबाट पक्रेर रातभर हिरासतमा थुनेको हो ।

सर्वसाधारणले प्रदर्शन गरिरहेको ठाउँमा भिडियो खिच्दा उनीहरूलाई प्रहरीले नियन्त्रणमा लिएको स्थानियले जानकारी दिएका छन् ।

जिल्ला प्रहरी कार्यालयका प्रवक्ता प्रहरी नायव उपरिक्षक (डिएसपी) मन्जिल मुकारुङले ११ जना पक्राउ परेको बताए । उनले पक्राउ परेकाहरुको पहिचान नखुलेको समेत बताए ।

पक्राउ परेका पत्रकार र युट्युबरले पीडित परिवारको पहिचान खुलाएको आरोपमा उनिहरुलाई नियन्त्रणमा लिएको प्रहरीले जनाएको छ ।