काठमाडौँ । आईसीसी क्रिकेट वल्र्ड कप लिग २ मा नेपालले पापुवा न्युगिनी (पीएनजी)लाई सात विकेटले पराजित गरेको छ। पीएनजीले दिएको १७४ रन पछ्याएको नेपालले तीन विकेट गुमाउँदै लक्ष्य भेट्टाएको हो।

टस हारेर पहिले ब्याटिङ गरेको पीएनजीले निर्धारित ५० ओभरमा ८ विकेट गुमाउँदै १७३ रन बनाएको थियो। जवाफी ब्याटिङमा उत्रिएको नेपालले ३६.५ ओभरमा तीन विकेट गुमाउँदै पीएनजीलाई पराजित गरेको हो।

नेपालको जितमा कुशल भुर्तेल र आरिफ शेखले अर्धसतकीय पारी खेले। शेखले १०२ बलमा अविजित ५९ रन बनाए। भुर्तेलले ६४ बलमा ५० रन जोडेका थिए। यस्तै रोहित पौडेलले अविजित ४४ रनको योगदान दिए। आसिफ शेख २ रनमा आउट हुँदा दिनेन्द्र ऐरी शून्य रनमा फर्किएका थिए ।

यसअघि भएको खेलमा पनि नेपालले पीएनजीलाई हराएको थियो।