काठमाडौँ । प्रहरीले मकवानपुरको छुट्टाछुट्टै स्थानबाट अवैध लागू औषधसहित तीन जनालाई पक्राउ गरेको छ । इलाका प्रहरी कार्यालय पशुपतिनगर हेटौंडाबाट खटिएको टोलीले पूर्वपश्चिम राजमार्गअन्तर्गत हेटौंडा १५ रातोमाटे चेकपोष्टबाट ४ ग्राम खैरोहिरोइन र १३ ट्याब्लेट नाईट्रोभेट सहित एक जनालाई पक्राउ गरेको हो ।

पक्राउ पर्नेमा धादिङ निलकण्ठ नगरपालिका १४ का २९ वर्षीय बलराम गुरुङ रहेका छन् । वीरगञ्जबाट हेटौंडा आउँदै गरेको प्र ३–०२–००६ प २६१४ नम्बरको मोटरसाइकल चेकिङको क्रममा उनलाई पक्राउ गरिएको जिल्ला प्रहरी कार्यालय मकवानपुका प्रहरी नायव उपरिक्षक जयश्वर रिमालले जानकारी दिए ।

यस्तै, जिल्ला प्रहरी कार्यालय मकवानपुरको टोलीले हेटौंडा २ संगमचोकबाट २ ग्राम ७५० मिलिग्राम खैरोहिरोइन सहित दुई जनालाई पक्राउ गरेको छ । पक्राउ पर्नेमा हेटौंडा १५ का २३ वर्षीय राजेश खाती र राक्सिराङ गाउँपालिका ३ का २० वर्षीया आयुषा ठकुरी रहेका छन् ।

प्रहरीले ना ४३ प ८६५१ नम्बरको मोटरसाइकलसहित उनीहरूलाई पक्राउ गरेको हो । पक्राउ परेका उनीहरूलाई जिल्ला अदालत मकवानपुरबाट म्याद थप गरेर आवश्यक अनुसन्धान भइरहेको मकवानपुर प्रहरीले जनाएको छ ।