काठमाडौं । २०७५ सालमा एमाले र माओवादीवीच हुन लागेको एकताप्रक्रियासँग असहमति राख्दै विश्वभक्त दुलाल ‘आहुती’को नेतृत्वको गठन भएकाो वैज्ञानिक समाजवादी कम्युनिष्ट पार्टीले स्थानीय तहको निर्वाचन बहिस्कार गर्ने भएको छ । मोहन वैध (किरण) नेतृत्वको नेकपा (क्रान्तिकारी माओवादी)ले जस्तै उक्त पार्टीले पनि चुनावमा भाग नलिने र चुनावको भण्डाफोर गर्ने निर्णय गरेको हो ।

‘यसै संसदीय व्यवस्था भित्रको निर्वाचनको औचित्य नरहेको निष्कर्ष पार्टीको छ,’ केन्द्रीय सदस्य जागृत रायमाझीले भने, ‘यो संसदीय व्यवस्था भित्रको निर्वाचन किन औचित्यहीन छ भनेर हामी भण्डारफोर अभियान सञ्चालन गर्दै छौँ ।’

काठमाडौंमा शनिवार सम्पन्न उक्त पार्टीको प्रथम राष्ट्रिय भेलाले ९९ सदस्यीय केन्द्रीय कमिटी चयन गर्दै निर्वाचन बहिस्कारको निर्णय गरेको थियो । 

केन्द्रीय सदस्य रायमाझीका अनुसार, सो भेलाले आहुतीलाई महासचिवमा चयनसमेत गरेको छ । २१ चैतमा बस्ने केन्द्रीय समितिको पहिलो बैठकले पार्टीको सचिवालय गठनदेखि अन्य विषयमा निर्णय लिने जनाउँदै रायमाझीले केन्द्रीय कमिटीमा ४० प्रतिशत महिला प्रतिनिधित्व गराएको जानकारी दिएका छन् ।