काठमाडौँ । समृद्धिका लागि सिभिल बैंक भन्ने नाराका साथ सञ्चालनमा आएको सिभिल बैंकले ‘अद्वितीय नेपाल’ शीर्षकमा नेपाली नयाँ वर्ष २०७९ को क्यालेण्डर सार्वजनिक गरेको छ ।

कोरेना महामारीको कारण करिब धराशायी भएको पर्यटन व्यवसायलाई यसले केही टेवा प्रदान गर्ने बैंकले विश्वास लिएको छ । उक्त क्यालेण्डरमा नेपालका नवीन अद्वितीय भ्रमण गन्तब्यहरूको छोटो टिप्पणी समावेश गरिएको छ । यस क्यालेण्डरका तस्वीर इमेज पसल डटकमबाट खरिद गरिएको तथा घुमन्तेद्वारा खिचिएको तस्बिरहरू हुन् ।

यस क्यालेण्डरले नेपालको भ्रमण गन्तव्यहरूका बारेमा जानकारी दिने बैंकका प्रमुख कार्यकारी अधिकृत सुनिल पोखरेलले बताए ।

यस्तै, यस बैंक र नेपाल स्टक एक्सचेञ्ज लिमिटेडबीच सिभिल बैंक लिमिटेडको १०.२५ प्रतिशत ब्याजदर भएको ‘सिभिल बैंक डिबेञ्चर २०८८’ ऋणपत्रको क्रम संख्या १ देखि ३० लाख कित्ता ऋणपत्र सूचीकरण गर्ने सम्झौता सम्पन्न भएको छ । उक्त सम्झौतापत्रमा सिभिल बैंकको तर्फबाट पोखरेल र एक्स्चेञ्जका प्रमुख कार्यकारी अधिकृत कृष्ण बहादुर कार्कीले हस्ताक्षर गरेका थिए ।

उक्त डिबेञ्चर लक्ष्मी क्यापिटल मार्केटमार्फत बिक्री खुल्ला गरिएको थियो र वितरण भएको ३० लाख कित्ता डिबेन्चर अब २०७८ चैत्र ३० बाट नेपाल स्टक एक्स्चेञ्जमा कारोबार गर्न सकिने छ ।